៥ វិធីជួយអ្នកសម្រកទម្ងន់ សូម្បីតែពេលកំពុងគេងក៏អាចស្រកបានដែរ
ពន្លឺភ្លើងត្រឹមត្រូវនៅក្នុងបន្ទប់គេងរបស់អ្នក ធ្វើលំហាត់ប្រាណត្រឹមត្រូវមុនពេលចូលគេង និងសូម្បីតែសម្លៀកបំពាក់គេង - វិធីទាំង ៣ នេះគឺជាជំនួយសម្រាប់អ្នកដែលចង់រក្សារាង។មានវិធីជាច្រើនទៀតដែលយើងមិនបានដឹង ដែលអាចជួយយើងទប់ទល់នឹងការឡើងទម្ងន់ សូម្បីតែពេលសម្រាកក៏ដោយ។
ខាងក្រោមនេះជាវិធី ៥ យ៉ាងដើម្បីរក្សារាង សូម្បីតែនៅពេលអ្នកសម្រាកលើខ្នើយទន់របស់អ្នកនៅពេលយប់ក៏ដោយ។
1. គេងដោយគ្មានសម្លៀកបំពាក់
នៅពេលដែលអ្នកគេងគ្មានសម្លៀកបំពាក់ អ្នកទទួលបានអត្ថប្រយោជន៍សុខភាពមួយចំនួន ហើយជួយអ្នកក្នុងការសម្រកទម្ងន់ទៀតផង។ អ្នកវិទ្យាសាស្ត្រណែនាំថា ការរក្សាសីតុណ្ហភាពរាងកាយរបស់អ្នកឱ្យកាន់តែត្រជាក់ នៅពេលអ្នកគេងធ្វើឱ្យការរំលាយអាហាររបស់រាងកាយលឿនជាងមុន ព្រោះវាផលិតជាតិខ្លាញ់ពណ៌ត្នោតកាន់តែច្រើន ដើម្បីរក្សាកម្តៅ។
ខ្លាញ់ពណ៌ត្នោតផលិតកម្តៅ ខណៈពេលដែលវាដុតកាឡូរី ហើយការណ៍នេះបង្កើនល្បឿនការរំលាយអាហាររបស់អ្នកអំឡុងពេលថ្ងៃ ដើម្បីជួយអ្នកសម្រកទម្ងន់។ ការគេងដោយគ្មានសម្លៀកបំពាក់ក៏ធ្វើឱ្យឈាមរត់បានល្អដែរ ហើយវាល្អសម្រាប់បេះដូង និងសាច់ដុំ។
2. គេងគ្រប់គ្រាន់
វេជ្ជបណ្ឌិត Richard K. Bogan អ្នកស្រាវជ្រាវអំពីការគេងបាននិយាយថា ការកំណត់កាលវិភាគនៃការគេងអាចជួយយើងក្នុងការសម្រកទម្ងន់។ “ការគេងគឺចាំបាច់សម្រាប់មុខងារធម្មតារបស់អរម៉ូន និងប្រព័ន្ធការពាររាងកាយ។ ខួរក្បាលដែលគេងមិនលក់ ឬអត់ងងុយ គឺជាខួរក្បាលដែលស្រេកឃ្លាន។ ការគេងមិនបានគ្រប់គ្រាន់នាំឱ្យឡើងទម្ងន់។"
គាត់បានណែនាំថា មនុស្សពេញវ័យត្រូវការគេងប្រហែល ៧ ម៉ោងកន្លះទៅ ៩ ម៉ោង។
3. ការហាត់ប្រាណត្រឹមត្រូវ
ប្រសិនបើអ្នកមានម៉ាសសាច់ដុំច្រើន វាជួយអ្នកដុតកាឡូរីកាន់តែច្រើន ទោះបីជាអ្នកកំពុងគេងក៏ដោយ។ ការធ្វើលំហាត់ប្រាណប្រចាំថ្ងៃ ជាពិសេសការហាត់កម្លាំង អាចជួយអ្នកឱ្យស្រកទម្ងន់បាន។ សូមសាកល្បងធ្វើលំហាត់ប្រាណរបស់អ្នក១ម៉ោងមុនពេលចូលគេង។
4. គេងក្នុងបន្ទប់គេងដែលត្រជាក់ និងងងឹត
យោងតាមការសិក្សាមួយ មនុស្សដែលគេងក្នុងបន្ទប់មានសីតុណ្ហភាព១៨អង្សារ ក្នុងរយៈពេលមួយខែបានដុតបំផ្លាញកាឡូរី 42% និងបង្កើនការរំលាយអាហាររបស់ពួកគេ 10% ។
ដើម្បីសម្រកទម្ងន់ពេលអ្នកគេង សូមព្យាយាមបិទពន្លឺពេលយប់ផងដែរ។ ការស្រាវជ្រាវណែនាំថាពន្លឺមុនពេលចូលគេងកាត់បន្ថយកម្រិតនៃសារធាតុ melatonin របស់អ្នក ហើយប្រសិនបើអ្នកគេងដោយបើកភ្លើង នោះវាជះឥទ្ធិពលយ៉ាងខ្លាំងទៅលើ circadian នៃមេតាបូលីស ហើយក្លាយជាហេតុផលនាំការឡើងទម្ងន់ នេះបើយោងតាម Sleep Foundation ។ ដូច្នេះ សូមបិទទូរទស្សន៍ ទូរសព្ទ និងពន្លឺភ្លើងផ្សេងទៀត និងធ្វើយ៉ាងណាកុំឱ្យមានពន្លឺពីខាងក្រៅជះចូល។
5. កំណត់ពេលវេលាទទួលទានអាហារ
យោងតាមអ្នកជំនាញអាហារូបត្ថម្ភ ម៉ោងទទួលទានអាហារ និងដំណេកគួរតែរក្សាជាទម្លាប់ក្នុងកាលវិភាគដដែលជារៀងរាល់ថ្ងៃ។ លោកស្រី Charlotte Harrison អ្នកឯកទេសអាហារូបត្ថម្ភដែលមានមូលដ្ឋាននៅទីក្រុងឡុងដ៍និយាយថា "រាងកាយរបស់យើងដំណើរការតាមចង្វាក់ circadian ដែលជាប្រៀបបាននឹងនាឡិកាកំណត់ពេល។ ពេលវេលាទទួលទានអាហារមានឥទ្ធិពលច្រើនលើចង្វាក់ circadian របស់យើង ដូច្នេះ ការកំណត់កាលវិភាគទទួលទានអាហាររបស់យើងគឺមានសារៈសំខាន់ខ្លាំងណាស់។”
ប្រែសម្រួល៖ វីរៈ
ព័ត៌មានថ្មីៗ
